Bleach

So, ändlich dure mit de big 3. ich ha leider nit d möglichkeit alli drei uf eimol z rate, au wenn ich das will und ich fänds unfair gegenüber bleach, das jetzt do z mache. aber biz vergliche muessis trotzdem. aber eins nach em andere: Bleach isch e sehr geili experience. guet story mässig hetts jetzt nit allzu viel z biete und au d figure lönn an komplexität z wünsche übrig, aber ich glaub nit, dass es s ziel vom mangaka gsi isch, e sehr e tiefgründigi story über läbe und tod z mache, au wenns für das mit dere prämisse uf jede fall potenzial ka hätt. nei, bleach besticht vor allem durch zwei sache: fights und style. fömmr bi de fights ah.

stärki nr.1: fights
bleach bestoht eigentlich zu 80% us kämpf. das isches was d reihe usmacht und das isch zum glück au s glungenste devo. d fights sin bombastisch und d stakes sin immer irgendneume in de obere stratosphäre. sälbst wenn d fähigkeite vo de figure mol eher wacky sin, wird durch das de epischi aspekt nit im gringste gmindert. im gegeteil, d fähigkeite spiele eigentlich nie wirklich e krassi rolle. es goht immer nur drum, no schnäller, no stärker und no mehr over the top zsi. das wird au illustriert durch de mc: de ichigo hett nit wirklich irgend e spezielli fähigkeit; er isch, was das abelangt, e typische shonen protagonist. aber d entwicklig vo sine kräft (nit vo ihm als charakter) isch sehr griffbar und funktioniert sehr guet mit de wachsende stakes.

was das abelangt nimmt sich bleach au sehr ernst. d fights sin das, was d story usmache und dorum bassiert au alles an entwicklig vo de figure in de fights (mit usnahm vom fullbring arc). das isch e sehr typischs shonen element, wo do extrem guet gnutzt wird

stärki nr. 2: style
d art und wiis, wie bleach präsentiert wird, macht au e grosse teil vo minere begeisterig defür us. das bezieht sich vor allem uf zwei aspekt. zum eine d figure: d figure vo bleach hän e unglaubliche swag, und in de chapter covers wird sehr viel wert druf glegt, sie so cool und charismatisch wie möglich s präsentiere/inszeniere. chapeau au do defür, dass me sie trotz em fakt, dass di meiste di glichi kleidig ahän, immer usenanderhalte ka und sie trotzdem sau unique sin.

de zweiti aspekt isch de nutze vo de schwarz-und-wiss-"palette". wie di meiste mangas isch au bleach bis uf d cover usschliesslich in schwarzwiss ghalte und de mangaka schaffts, die beide tön unglaublich stark z verwände und losst so de manga e sau coole look ha. während me bi andere wärk unter anderem au wäg em farbaspekt de anime bevorzugt, wär bleach glaub eifach nit s gliche ohni de schwarzwiss-look. ich bi dorum sehr gspannt uf d tybw-adaptione.

schwächene: Bleach hett, wie scho erwähnt, au einigi schwächene. wie bi andere shonen sin d figure sehr platt und eher eidimensional. di meiste sin eifach klischeehaft und bliebe au di ganzi zit eso, au sin vieli backgroundstories nit sehr überzügend und verhälfe nur in einzelne fäll zu enere gwüsse emotionale tiefi. Rukia isch minere meinig noch do s beste bispiel, vor allem in de erste arcs erfahrt me sehr viel über ihri vergangeheit mit ihrem brueder und Shiba. Au interessant sin Kenpachi, bi däm aber mit sinere connection zu Yachiru au eifach s meiste sehr oberflächlich bliebt.

wie scho gseit isch de plot sehr nebesächlich, ich ha aber wie erwähnt s gfühl, dass do absichtlich nit sehr viel fokus druf glegt wird. gwüssi sache störe denn aber doch biz, grad was em Ichigo sini familiegschicht ahgoht fühlt sich vieles eifach bizli so ah, als wärs erst zumene spötere zitpunkt so plant worde. Bleach hett au nit wirklich e grössers ziel, wies z.b Naruto und One Piece hän (ich ka d vergliich doch nit loh sorry). di einzelne arcs diene nit wirklich emene grössere plot, hän aber durchuss e zämmehang. wie gseit funktionierts trotzdem, well di einzelne arcs sehr gueti stakes für gueti fights kreiere. minere meinig noch sin d arcs au grössteteils ahgnähm lang, bis uf de arrancar arc, dä zieht sich biz und zwar durchgehend.

vergliech:
kömme mr, bevor mr e fazit ziehn, aber doch no schnäll zumene vergliech bzw. zunere ihordnig, well das wohl doch di einzigi plattform isch, wo ich die möglichkeit no ha wird. One Piece, Naruto und Bleach. ich bi, wie dene ei bis zwei nase wo die review läse, bekannt si wird, kei grosse fan vo dene wärk. ich find sie aber au nit scheisse. sie hän alli ihri individuelle stärke, wobi sich aber Bleach stärker vo de andere zwei unterscheidet. One Piece- und Naruto-Fans stritte sich scho ewigs drum was vo beidem besser isch und abgseh devo dass die diskussion unnötig isch ka ich eigentlich nur öbbis zu däm diskurs bitrage: sie hän beidi verdammt viel ähnlichkeite. natürlich nit was s setting und de plot betrifft, aber es git sehr viel story bzw figure element, wo sie ufere writing ebeni teile. sie sin beidi durchzoge vo shonen typische element. aber das isch no nit alles. ich find, d hauptähnlichkeit liegt bi de figure: me findet in beidne wärk di gliche archetype, fähigkeite und arte vo "character development". was ich am ahfang no als argument für Naruto brucht ha, han ich nach wiederholtem reflektiere müesse als blödsinn abtue. Naruto characters sin im allgemeine nit tiefgründiger und durchlaufe au kei besseri entwicklig als One Piece figure. es sin einzig und ellei di prominäntere figure Naruto, Sasuke, Obito und minetwäge Shikamaru, wo wirklich e entwicklig hän. Bi One Piece giz halt wirklich gar nüt, das muess me trotzdem festhalte.

Aber lömr das Geplänkel und beziehn ändlich au de protagonist vo däre review mit ih: wie stand ich denn jetzt im bezug uf d big 3 zu Bleach? do kann ich mich eigentlich kurz halte: Ich ha, nach de erste paar dutzend kapitel Bleach s gfühl ka, dasses di mit abstand schlächtisti vo de drei reihene isch. aber zu däm zitpunkt han ich bleach eifach no mit de gliche auge betrachtet wie Naruto und One Piece, und das isch mi Fehler gsi. Bleach ghört zwar zu de big 3, isch aber doch öbbis anders als die beide. es setzt, wie in de obere abschnitt zu gnüege erwähnt, uf anderi aspekt. de Tite Kubo weiss, was er guet ka, und well er das weiss macht er däm mehr Platz. Und es funktioniert so eifach dütlich besser als di andere beide. Ich würd trotzdem nit sage, dass ich Bleach s beste wärk vo de big three find, well ich halt trotzdem lieber character-driven stories ha, aber es hett e bsundere platz verdient. minere meinig noch absolut läsenswert.